Xuraman Muradova: Dünya Yalandı, Oğlum!

Aldanma rənginə, şan-şöhrətinə,

Dünyaya uyma ki, dünya yalandı.

Bağlanma fənanın boş ləzzətinə,

Saraylar, sultanlar yerdə qalandı.

Mən səcdə qıldıqca gerçəyi gördüm,

Bu ömrü dualar üstə mən hördüm.

Nəfsi namazımla mən yerə sərdim,

Bir Haqqın dərgahı baqi qalandı.

Canım oğlum, qəlbin nura bələnsin,

Gözündən haqq üçün yaşlar ələnsin.

İstə ki, Rəbbindən rəhmət dilənsin,

Allahdan qeyrisi, vallah, yalandı.

Əlimi açanda adındır duam,

Sənsən mənim üçün ən şirin sevdam.

Düzlükdən ayrılma, ey mənim balam!

Düzlük bir qaladır, dünya yalandı.