Xuraman Muradova - SƏN GİZLİ BİR SİRR TƏK ÜRƏYİMDƏSƏN

Həsrətin səssizcə qapımı döyər,
Hər gecə yuxuma bir kədər enər.
Adını çəkəndə səsim titrəyər,
Sən gizli bir sirr tək ürəyimdəsən.

Bir gizli yuxutək könlümdə qaldın,
Qəlbimə silinməz izini saldın.
Gedəndə ömrümün yazını aldın,
Sən gizli bir sirr tək ürəyimdəsən.

Gözünün yaşını silib susaram,
Dərdini özümə həmdəm tutaram.
Özümü unudub səni duyaram,
Sən gizli bir sirr tək ürəyimdəsən.

İllərin ardınca izlərin qalar,
Xəyalımda yaşlı gözlərin qalar.
Mənə deyilməmiş sözlərin qalar,
Sən gizli bir sirr tək ürəyimdəsən.