Xuraman Muradova - GÖRMÜRSƏN MƏNİ

Səmadan ulduztək axıb düşsəm də,
Hər zülmət gecədə gəzərdin məni.
Gündüztək saçılan nuram önündə,
Gözlərin tutulub, görmürsən məni.

Dəniztək ləpələr vurdu sahilə,
Dalğalar qoynunda dilərdin məni.
İndi bir damlayam ovcunun üstə,
Baxıb gözlərində boğdunmu məni?

Rüzgarla ötüşən xəzəllər kimi,
Hər əsən küləkdə sezərdin məni.
Qapının ağzında dayanmışam, bax,
Sükutmu bağlayıb o lal sinəni?..

Harada qaldımsa gecə, ya gündüz,
Soraqladın məni, izlədin məni.
İndi qarşındayam, baxış-baxışa,
Hardan səslənim, duyasan məni?..

Uzaqda olanda yollar boyunca,
Adımla çağırdın, səslədin məni.
İndi yanındayam, bircə addımlıq,
Hansı yana keçim, görəsən məni?..

Kölgətək arxamca dolandın hər an,
Könlün xəyallarda axtardı məni.
İndi lap yaxında, önündə durdum,
Daha hara gedim, tapasan məni?..

Rəy yaz