Xuraman Muradova: “30 Avqust – Türkün yenilməz ruhunun, azadlıq eşqinin və Zəfər yaddaşının günüdür”

30 avqust tarixi Türk dünyasının yaddaşında azadlığın, milli iradənin, Vətənə sədaqətin və yenilməz ruhun böyük hərflərlə yazıldığı gündür.
Bu gün qardaş Türkiyə Cümhuriyyəti Böyük Zəfərin 104-cü ildönümünü qeyd edir. 30 Avqust 1922-ci ildə Gazi Mustafa Kemal Atatürkün başkomandanlığında qazanılan Başkomandanlıq Meydan Müharibəsi Milli Mücadilənin həlledici qələbəsi oldu və Türk millətinin istiqlal əzmini tarix qarşısında əbədi təsdiqlədi..
Mən bir şair kimi bu möhtəşəm tarixi hadisəyə baxarkən yalnız bir hərbi qələbəni deyil, bir millətin yenidən ayağa qalxışını görürəm.
Çünki tarixdə elə zəfərlər var ki, onların mənası bir döyüş meydanının sərhədlərini çoxdan aşır. 30 Avqust da məhz belə bir zəfərdir. Bu, “mən varam, mən azadam, mən öz taleyimin sahibiyəm” deyən böyük Türk iradəsinin dünyaya bəyanıdır.
Dumlupınarda qazanılan qələbənin arxasında yalnız silah və hərbi strategiya yox, Vətən sevgisi, milli birlik, fədakarlıq və azad yaşamaq əzmi dayanırdı. 26 avqustda başlayan Böyük Taarruzun 30 avqustda Başkomandanlıq Meydan Müharibəsinin qəti qələbəsi ilə nəticələnməsi Türk tarixinin ən parlaq səhifələrindən birinə çevrildi.
Atatürk Sitesi
Bu zəfərin başında isə Türk dünyasının böyük dövlətçilik simalarından biri – Qazi Mustafa Kemal Atatürk dayanırdı. Onun rəhbərliyi ilə Türk xalqı bütün dünyaya göstərdi ki, bir millətin iradəsi sarsılmazdırsa, heç bir işğal, heç bir təzyiq, heç bir məhrumiyyət onun azadlıq istəyini məğlub edə bilməz.
Bu gün 30 Avqustun mənəvi işığında yalnız Anadolunun deyil, bütün Türk dünyasının ürəyində bir qürur duyğusu baş qaldırır.
Çünki Türk dünyasının taleyi bir-birindən ayrı yazılmayan ortaq bir tarixdir. Malazgirtdən Çanaqqalaya, Dumlupınardan Şuşaya qədər uzanan böyük tarix yolunda bizi birləşdirən ən böyük qüvvələrdən biri Vətən sevgimiz, milli yaddaşımız və azadlıq ruhumuzdur.
Azərbaycanlı bir şair kimi Türkiyənin Zəfər Bayramını öz xalqımın bayramı qədər doğma və əziz sayıram. Çünki Azərbaycanın sevinci Türkiyənin sevincindən, Türkiyənin Zəfəri Azərbaycanın qürurundan ayrı deyil. Ulu öndər Heydər Əliyevin müdrik kəlamında ifadə olunan “Bir millət, iki dövlət” həqiqəti bu gün həyatın bütün sahələrində öz möhtəşəm təsdiqini tapır.
Bu gün Azərbaycan-Türkiyə qardaşlığı tariximizin heç bir dönəmində olmadığı qədər möhkəmdir. Şuşa Bəyannaməsi ilə müttəfiqlik səviyyəsinə yüksəlmiş bu münasibətlər iki dövlətin deyil, bütövlükdə Türk dünyasının gücünə və gələcəyinə xidmət edən tarixi bir birlik nümunəsidir.
Mənim üçün Turan yalnız xəritədəki coğrafi məkan deyil.
Turan ortaq yaddaşdır.
Turan ortaq dildir.
Turan ortaq mədəniyyətdir.
Turan ortaq tarixdir.
Turan bir-birinin sevincini öz sevinci, ağrısını öz ağrısı bilən böyük mənəvi ailədir.
Bu mənada 30 Avqust Zəfər Bayramı bütün Türk dünyasının qəlbində yaşayan müqəddəs bir qürur günüdür.
Bu gün biz Qazi Mustafa Kemal Atatürkün və istiqlal mücadiləsinin bütün qəhrəmanlarının qarşısında baş əyirik. Vətən uğrunda canından keçən şəhidlərimizi sonsuz ehtiramla yad edir, qazilərimizin qarşısında minnətdarlıqla baş əyirik.
Türk dünyasının qadın şairləri adından, Azərbaycan ədəbiyyatının və mənim mənsub olduğum Türk Dünyası Qadın Şairlər Birliyinin adından qardaş Türkiyənin xalqını, dövlətini və bütün türk qardaşlarımızı bu müqəddəs gün münasibətilə ürəkdən təbrik edirəm.
Qoy Türk dünyasının üzərində həmişə sülh, əmin-amanlıq və Zəfər günəşinin işığı parlasın!
Qoy Dumlupınardan yüksələn istiqlal ruhu nəsildən-nəslə ötürülsün!
Qoy Türkün bayrağı daim ucalarda dalğalansın!
30 Avqust Zəfər Bayramınız mübarək, əziz Türkiyə!
Zəfəriniz bizim zəfərimizdir!
Qürurunuz bizim qürurumuzdur!
Türkiyə var olsun!
Azərbaycan-Türkiyə qardaşlığı əbədi olsun!
Türk dünyamız daim var olsun!