Xuraman Muradova: Bir dua qapılar açar, ya Rəbbim!

27 December 2025 Şeirlərim

Nə var-dövlət qalar, nə də alqışlar,

Bir dua yetər ki, ruhum şad olsun.

İnsan bu dünyada yolçudur, ya Rəbb,

Xeyir əməllərlə ruh abad olsun.

Könül qırmaq gərək deyil dünyada,

Bir salam, təbəssüm qoy qalsın geri.

Əmanətdur mal da, mülk də əslində,

Qul Rəbbindən utansın, dursun geri.

Şöhrət külək kimi əsər, sovrular,

Adlar unudular, izlər silinər.

Qəlbində olanlar axirət yolu,

Haqq qatında hər niyyətin bilinər.

Bir yaxşılıq səssiz göylərə qalxar,

Bir dua qapılar açar, Ya Rəbbim.

Mən Səndən halallıq istərəm təkcə,

Qalmayım yolunda naçar, Ya Rəbbim.